Ҫӗнӗ Шупашкарта пурӑнакан Роза Иванова юпа уйӑхӗн 9-мӗшӗнчен килтен тухса кайнӑ та тек ӑна никам та курман. 2003 ҫулта ҫуралнӑ хӗр ҫухални тӗлӗшпе Следстви комитечӗ пуҫиле ӗҫ пуҫарнӑ.
Роза аппӑшӗн хваттерӗнчен кайнӑ. Вӑл килтен 11 сехет тӗлӗнче тухнӑ. Хӗр ӑҫта кайни паллӑ мар. Тӑванӗсем пӑшӑрханаҫҫӗ, ӑна шыраҫҫӗ. Вӗсем полицие кайса заявлени ҫырнӑ.
Роза Иванов 17 ҫулти пек курӑнать, 160-165 сантиметр ҫӳллӗш. Ҫӳҫӗ ҫутӑрах, хулпуҫҫи таран. Сылтӑм куҫ харши тӗлӗнче суран йӗрӗ пур. Килтен кайнӑ чухне хӑмӑр куртка, хура шӑлавар, хура пушмак тӑхӑннӑ пулнӑ. Ӑна курнӑ тӑк пӗр тӑхтамасӑр полицие пӗлтерме ыйтаҫҫӗ.
Паян, юпа уйӑхӗн 3-мӗшӗнче, Шупашкарти харпӑр секторти пӗр ҫуртра 65 ҫулти арҫын виллине тупнӑ. Унӑн мӑйӗ тавра электричество кабелӗпе ултӑ хутчен ҫавӑрса пӑвнӑ. Кӗлетки ҫинче пусмӑрласа вӗлернӗ йӗрсем пулнӑран кун тӗлӗшпе пуҫиле ӗҫ пуҫарнӑ.
Ҫак преступление тума пултарнӑ ҫынна тытса чарнӑ. Шупашкарта пурӑнакан 62 ҫулти арҫын паян ҫав харпӑр секторта кӳршӗ ҫуртра каннӑ. Ӑна тытса чарнӑ, следстви вӑхӑтӗнче хупса лартнӑ.
Халӗ, Следстви комитечӗ пӗлтернӗ тӑрӑх, ӗҫ-пуҫа уҫӑмлатаҫҫӗ.
Паян ирхине 6 сехет те 10 минутра Шупашкарти Алькеш поселокӗнче ҫамрӑк арҫын виллине тупнӑ. Следстви комитечӗ кун тӗлӗшпе тӗрӗслев ирттерет.
Малтанлӑха палӑртнӑ тӑрӑх, 28 ҫулти арҫын ӗнер каҫхи 6 сехетре Гоголь урамӗнчи общежити чӳречинчен тухса ӳкнӗ. Виллине вара тепӗр кун ҫеҫ тупнӑ.
Ҫынсем каланӑ тӑрӑх, ҫак арҫын Мускавра ӗҫленӗ, вӑл унтан таврӑнсан пӗлӗшӗсемпе эрех ӗҫкеленӗ. Ирхине вара унӑн виллине чӳрече айӗнче тупнӑ.
Вӑрнар районӗнчи Нурӑс сали ҫывӑхӗнчи пӗвере пулӑҫ путса вилнӗ. Авӑн уйӑхӗн 20-мӗшӗнче Ҫӗрпӳре пурӑнакан арҫынна шырава панӑ. Тӑванӗсем каланӑ тӑрӑх, вӑл пулла кайсан ҫухалнӑ.
Авӑнӑн 22-мӗшӗнче унӑн виллине Вӑрнар районӗнчи Нурӑс ялӗ ҫывӑхӗнчи пӗвере, масартан инҫех мар, тупнӑ. Арҫыннӑн кӗлетки ҫинче пусмӑрласа вӗлернӗ йӗр ҫук.
Следстви комитечӗ пӗлтернӗ тӑрӑх, ҫак тӗслӗх тӗлӗшпе тӗрӗслев иртет, ӗҫ-пуҫ мӗнле пулса иртнине уҫӑмлатаҫҫӗ.
Ӗнер, авӑн уйӑхӗн 5-мӗшӗнче, Шупашкарта арҫын нумай хутлӑ хваттер чӳречинчен ӳкнӗ. Кун пирки «Про Город» хаҫата халӑх корреспонденчӗ пӗлтернӗ.
Ку ӗнер 16 сехет тӗлӗнче пулнӑ. 9-мӗш Пилӗкҫуллӑх урамӗнчи 28-мӗш ҫуртӑн 39-мӗш корпусӗнчи 13-мӗш хутран арҫын аялалла персе аннӑ. Вӑл 35 ҫулта пулнӑ. Вырӑна йӗрке хуралҫисем ҫитнӗ.
РФ Следстви комитечӗ пӗлтернӗ тӑрӑх, ку тӗслӗх тӗлӗшпе процессуаллӑ тӗрӗслев иртет.
Вӑрнар районӗнче пурӑнакан 29 ҫулти арҫын тӑван мар пӗчӗк ывӑлне тӑтӑшах хӗненӗ. Ун тӗлӗшпе РФ Следстви комитечӗ пуҫиле ӗҫ пуҫарнӑ.
Следстви версийӗ тӑрӑх, кӑҫал ҫӗртме-утӑ уйӑхӗсенче ҫак арҫын, Хирпуҫ ялӗнче пурӑнаканскер, пӗрле пурӑнакан хӗрарӑмӑн пӗчӗк ывӑлне хӗненӗ. Ҫав самантсене вӑл ӳсӗр пулнӑ.
Арҫын 5 ҫулти арҫын ачана аллипе ҫапнӑ, урипе тапнӑ. Халӗ судпа медицина экспертизи ирттереҫҫӗ. Следователь вара арҫынна следстви вӑхӑтӗнче ирӗксӗр хӑварас ыйтӑва татса парать.
Шупашкарти васкавлӑ медпулашу пульницин ҫурчӗ умӗнче арҫын виллине тупнӑ. Кун пирки «Про Город» хаҫата халӑх корреспонденчӗ пӗлтернӗ.
Ку ӗнер пулнӑ. Васкавлӑ медпулӑшу пульници умӗнче арҫын 49 ҫулта пулнӑ. Малтанлӑха пӗлтернӗ тӑрӑх, вӑл пульницӑри пӗр уйрӑмра сипленнӗ.
Следстви комитечӗ пӗлтернӗ тӑрӑх, халӗ кун тӗлӗшпе тӗрӗслев иртет. Арҫын мӗнле сӑлтава тата мӗншӗн вилнине следовательсем уҫӑмлатаҫҫӗ.
Ҫу уйӑхӗн 21-мӗшӗнче 16 сехет те 50 минутра Шупашкарти «Ҫӗнӗ хула» микрорайонта арҫын виллине тупнӑ. Вилене Шупашкар проспектӗнчи 25-мӗш ҫурт ҫывӑхӗнче асӑрханӑ.
Ҫакна курнӑ ҫынсем каланӑ тӑрӑх, кантӑк ванчӑкӗсем выртнӑ. Арҫын ҫӳллӗ хутри чӳречерен тухса ӳкме пултарнӑ. Хальлӗхе вӑл мӗншӗн, мӗнле майпа вилни паллӑ мар. Следстви комитечӗ ҫакна уҫӑмлатать.
Арҫын 40 ҫулти пек курӑнать. Инкек пулсанах вырӑна полици, Следстви комитечӗн ӗҫченӗсем килнӗ.
17 ҫулти каччӑ тӑванӗн укҫине вӑрланӑ тесе шутлаҫҫӗ. Ҫакна вӑл телефонпа усӑ курса тунӑ. Кун пирки РФ Следстви комитечӗн Чӑваш Енри следстви управленийӗн сайтӗнче хыпарланӑ.
Ку ӗҫ-пуҫ ака уйӑхӗн 29-мӗшӗнче пулса иртнӗ. Ҫур ҫӗр ҫитеспе, ун чухне ҫав каччӑ Канаш хулинче пурӑнакан 43-ри тӑванӗн килӗнче пулнӑ, укҫа-тенке хӑйӗн банк счечӗ ҫине куҫарнӑ.
Каччӑ тӗлӗшпе пуҫиле ӗҫ пуҫарнӑ. Ҫамрӑкскер тӑванӗн укҫине мӗн чухлӗ вӑрланине Следстви комитечӗн сайтӗнче палӑртман.
Вӑрнар районӗнчи Ҫавалкас ял тӑрӑхӗн пуҫлӑхӗ уплнӑ арҫынтӗлӗшпе пуҫиле ӗҫ пуҫарнӑ. Следовательсем вӑл ҫӗрпе ҫыхӑннӑ суя документсем хатӗрленӗ тесе шутлаҫҫӗ.
Следстви комитечӗ пӗлтернӗ тӑрӑх, 2012 ҫулхи нарӑс уйӑхӗнче пуҫлӑх ял тӑрӑхӗн хуҫалӑх кӗнекинчен суя выписка тунӑ. Ҫавна май унӑн пӗлӗшӗ Ҫавалкасри икӗ ҫӗр лаптӑкне хӑйӗн ҫине регистрациленӗ.
Арҫынна халӗ должноҫӗпе усӑ курнӑшӑн айӑпласшӑн. Ун тӗлӗшпе пуҫарнӑ пуҫиле ӗҫе малалла тӗпчеҫҫӗ.
+23.3 °C